ചില പുസ്തക ചിന്തകൾ

കാലങ്ങൾക്ക് ശേഷം വീണ്ടും പുസ്തകങ്ങളുമായി ഒരു കൂടിക്കാഴ്ച..
മനഃപൂർവം ഒഴിവാക്കി നിർത്തിയേക്കുവാരുന്നു അവരെ.വേറൊന്നും കൊണ്ടല്ല.ഒരെണ്ണം കൈയിൽ കയറി കൂടിയാൽ പിന്നെ വായിച്ചു തീരുന്നതു വരെ ഒരു മനസമാധാനവും കാണില്ല.ഊണും ഉറക്കവും മറന്നു പിന്നെ അതിനുള്ളിൽ സമാധി ഇരിക്കും. നീർമാതളവും ദേശത്തിന്റെ കഥയുമൊക്കെ അങ്ങനെ ഒറ്റ രാത്രി അടയിരുന്ന് വായിച്ചു തീർത്തവയിൽ ചിലതു മാത്രം.....അതൊക്കെ പണ്ട്..ഇന്നാണേൽ വീട്-കുട്ടികൾ-ജോലി- ഒക്കെ കൂടെ ചേർത്തൊരു ഞാണിൻമേൽ കളി ആണ്.അതിനിടയിൽ ഒരു പുസ്തകോം കൂടെ കിട്ടണ്ട കുറവെ ഒള്ളു....
പറഞ്ഞു വന്നത് പഴയ ചങ്ങാത്തം പൊടി തട്ടി എടുത്തതിനെ കുറിച്ചാണല്ലോ.... അതിനു നന്ദി ബംഗളൂരു ട്രാഫിക്കിനാണ്.30 മിനിറ്റു കൊണ്ട് എത്തി ചേരേണ്ട പുതിയ ഒാഫീസിലേക്കുള്ള യാത്ര ഒന്നര മണിക്കൂർ ആക്കി നീട്ടി തരുന്നതിന്..ഈ വിശ്രമ വേളകൾ വാട്സാപ്പ്,ഫേസ്ബുക്ക് മുതലായ നവ സമയം കൊല്ലികൾ ഉപയോഗിച്ച് ആനന്ദകരമാക്കാൻ ശ്രമിച്ചെന്കിലും മൊബൈൽ ഡാറ്റ റോക്കറ്റ് വിട്ടതു പോലെ പോണപോക്കു കണ്ടപ്പോൾ വേറെ മാർഗങ്ങളെ കുറിച്ചു ചിന്തിക്കാൻ നിർബന്ധിത ആകുകയും എന്തു കൊണ്ട് പുസ്തക ങ്ങൾ എന്ന ചിന്ത സഡൻ ബ്രേക്കിട്ടു മുന്നിൽ വന്നു നിൽക്കുവേം ചെയ്തു.പിന്നെ ഒന്നും ആലോചിച്ചില്ല...ആമസോൺ എടുത്ത് പടേന്ന് 3 ബുക്കങ്ങ് ഒാർഡർ ചെയ്തു. വായിക്കണമെന്ന് ഒരു പാടു കാലമായി ആഗ്രഹിച്ചു നടന്ന 3 ബുക്കുകൾ.

ആദ്യത്തേതു ദീപ ടീച്ചറുടെ ഭൂതക്കാലക്കുളിർ.ഒാഫീസിലേക്കുള്ള ഒറ്റ ട്രിപ്പിൽ അതങ്ങു തീർന്നു.ഇന്ന് മീരയുടെ ആരാച്ചാർ.52 അദ്ധ്യായങ്ങളിൽ 3 എണ്ണം കഴിഞ്ഞപ്പോൾ തന്നെ ചേതനാ ശൃദ്ധാമല്ലിക്ക് എന്ന 22 കാരി ആരാച്ചാരുമായി കട്ട ഫ്രണ്ട്ഷിപ്പായി...ഇനിയുള്ള കുറിച്ചു ദിവസങ്ങൾ ചേതനയോടൊപ്പം.......