ആദ്യമായിട്ടാണ് ഇങ്ങനെ ഒരു അവസ്ഥ.... ഒരു കഥയിലെ കഥാപാത്രങ്ങൾ അതിഭീകരമായി വേട്ടയാടുന്നു.രാത്രി 2 മണിവരെ ഇരുന്ന് ആരാച്ചാർ വായിച്ചു തീർത്തു... പിന്നീട് ഉറങ്ങാൻ കിടന്നിട്ട് കൺമുന്നിൽ ഒത്ത ഒരു തൂക്കുകയറുമായി ചേതന... ഒരു വിധം ഉറങ്ങിയപ്പോൾ സ്വപ്നത്തിലും.. തലമുടിക്കെട്ടഴിച്ച് ഒരു അലർച്ചയോടെ പാഞ്ഞു വരുന്ന ചേതന.. എന്നിലെ സ്ത്രീയെ പരിഹസിച്ച് അവൾ എന്റെ മുഖത്തേക്ക് ആഞ്ഞുതുപ്പി.. ഒന്നും മിണ്ടാൻ കഴിയാതെ മരവിച്ച ശരീരവും കുനിഞ്ഞ ശിരസുമായി ഞാൻ നിന്നു...ഒാടിച്ചു രക്ഷപ്പെടാൻ ഞാൻ ആഗ്രഹിച്ചു ...എന്നാൽ എന്റെ കാലുകൾ ബന്ധിക്കപ്പെട്ടിരിക്കുകയാണ് എന്ന് ഞെട്ടലോടെ ഞാൻ അറിഞ്ഞു.. ഉള്ളിൽ നിന്നും ഒരു ആർത്തനാദം ഉയർന്നു വന്നെന്കിലും ശബ്ദം പുറത്തേക്ക് വരാൻ കഴിയാതെ വിധം ഞാൻ അശക്തയായിരുന്നു... അവൾ എന്റെ കൈകൾ പുറകിലേക്കു ചേർത്തു വച്ചു കെട്ടി മുറുക്കി... പുച്ഛത്തോടെ എന്റെ മുഖത്തേക്ക് നോക്കി ഒരു നൂറു ചോദ്യങ്ങൾ...ഒന്നിനു പോലും എനിക്കു മറുപടി ഇല്ലായിരുന്നു.....അവൾ എന്നെ അടുത്ത മുറിയിലേക്കു നയിച്ചു... മെഴുകിന്റെ മണം അവിടെ നിറഞ്ഞിരുന്നു..അങ്ങു ദൂരെ ഞാൻ കണ്ടു, എന്റെ കൊലക്കയർ, അതെന്നെ നോക്കി പല്ലിളിച്ചു...
ഒരു അലർച്ചയോടെ ഞാൻ ഞെട്ടി ഉയർന്നു.സ്വപ്നമായിരുന്നു എന്ന യാഥാർത്ഥ്യത്തിലേക്ക് തിരിച്ചു വരാൻ കുറെ സമയം എടുത്തു ..പുറത്ത് ആർത്തലച്ചു പെയ്യുന്ന മഴയും തണുപ്പും...
ഞാൻ തോർത്തെടുത്ത് എന്റെ വിയർപ്പു തുടച്ചു...